KLINARO ni Joey de Leon na hindi ang noontime show na “It’s Showtime” ang pinatutsadahan niya kamakailan sa “Eat Bulaga.”
“Ito’y para lang matapos ‘yung mga usap-usapan — unang-una, hindi namin kaaway ‘yung ‘Showtime’,” ani Joey sa Instagram video.
“‘Yung ‘Showtime’, matagal na naming kapitbahay ‘yon. Hindi rin kami tinitira, hindi rin namin sila tinitira,” sabi pa niya.
“Ang pinapatungkulan namin ni Tito nu’ng nagalit kami sa ‘Eat Bulaga’ ay ‘yung mga social media na nagpo-post, ‘yung mga nagpoprograma. Kaya hinamon ko, 15 years kung tatagal ‘yung mga nagpo-post na ‘yon, hindi ‘Showtime’,” paliwanag niya.
Binati ni Joey ang “It’s Showtime” na magdiriwang ng 15th anniversary sa October.
“15 years na nga ‘yung ‘Showtime’ e. Ba’t ko hahamunin ‘yon?” hirit niya.
“Mahal namin ang ‘Showtime’ dahil kasabayan namin. Dadalawa na lang kami, ‘wag n’yo kaming pagsabungin. Magkakaibigan din kami.”
Matatandaang nag-viral ang hamon ni Joey sa mga naninira sa kanila, na tumagal muna ng 15 years at luluhuran niya ang mga ito.
“Inuulit namin na ‘yung galit namin ni Tito at ng mga Dabarkads at sama ng loob du’n sa mga nagpo-post na hindi free TV… ‘Yung mga salbahe doon. Talagang luluhod ako, didipa pa ako kung maka-15 years ‘yung mga tsismoso na ‘yun, ‘yung mga sinungaling na ‘yon,” sabi pa niya.
Bashers, hindi ‘It’s Showtime,’ hinamon ni Joey sa ‘15 years’
