MAY reunion concert ang legendary band na Eraserheads sa December 22 sa SMDC Festival Grounds sa Paranaque City.
Kinumpirma ng mga miyembro ng banda na sina Ely Buendia, Raimund Marasigan, Buddy Zabala at Marcus Adoro ang concert na “Huling El Bimbo” sa kanila-kanilang social media accounts.
“See you! Huling El Bimbo Concert 12.22.2022,” ani Zabala sa Instagram.
Ginawa ng apat ang anunsyo dalawang araw makaraan silang magbahagi ng cryptic post ukol sa letrang “E.”
Nabuwag ang grupo noong 2002 makaraan ang isang dekada ng mga hits gaya ng “Ang Huling El Bimbo,” “Magasin,” “Alapaap,” “Fruitcake,” “Ligaya” at “Pare Ko.”
