NILAWANAG ng tagapagsalita ni presidential bet Bongbong Marcos na si Atty. Vic Rodriguez na hindi umiwas sa handshake ang una kundi nagkasugat siya sa braso sa may pulso na tila nagka-impeksyon.
Ito ay matapos kumalat sa social media ang tila pagmamaldito ni Marcos Jr. habang nasa gitna ng kampanya nitong Biyernes sa Caloocan. Kitang-kita sa video ang tila padabog na pag-iwas ni Marcos sa mga taong umaabot sa kanyang kamay.
“Labing dalawang oras nang nakababad si BBM sa caravan at rally kahapon sa lungsod ng Caloocan matapos nyang ikutin kamakalawa ang halos buong Ilokandia na kasama si Inday Sara. Patuloy naman kaming iikot ngayon sa Lungsod ng Maynila sa pagpapatuloy ng aming kampanya,” sabi ni Rodriguez.
Idinagdag ni Rodriguez na hindi muna makikipagkamay si Bongbong para hindi lumala ang impeksyon.
“Hinihingi ng aming kampo ang pang-unawa ng ating mga kababayan at taga-suporta na iwasan na munang pisilin ang kamay at braso ni presidential candidate Bongbong Marcos upang hindi lumala ang impeksyon at mabilis na maghilom ang sugat nito,” ayon pa kay Rodriguez.
