IIMBESTIGAHAN ng Food and Drug Administration (FDA) ang umano’y malawakang distribusyon ng Ivermectin sa Quezon City na inorganisa nina Anakalusugan party-list Rep. Mike Defensor at Sagip party-list Rep. Rodante Marcoleta.
“Over the weekend, the FDA received several reports from social media, sa ating mga news outlet, pictures, report ng mga pasyente, and even professional groups showing that there may have been lapses or violations of the regulatory procedures,” ani FDA Director-General Eric Domingo.
“The regulatory enforcement unit ng FDA is investigating these complaints and, of course, meron naman po tayong due process na pagdadaanan at aaksyunan po natin batay sa ating mga magiging findings,” aniya.
Muling iginiit ni Domingo na hindi inirekomenda ng FDA at Department of Health (DOH) ang pag-inom ng Ivermectin bilang gamot sa Covid-19.
Aniya, kulang pa ang scientific evidence para masabing epektibo itong gamot laban sa nakahahawang sakit.
“We do not recommend the use of Ivermectin for the prevention and treatment for Covid-19 as the benefits of this antiparasitic drug for this purpose has not been established,” sabi ng opisyal.
Gayunman, binigyan ng FDA ng permiso ang limang ospital sa bansa para gamitin ang nasabing gamot sa kanilang mga pasyente.
