INIREKOMENDA ng OCTA Research group na pairalin hanggang sa susunod na buwan ang general community quarantine (GCQ) status sa Metro Manila at sa mga katabing probinsya.
Ayon kina OCTA Research fellows Professor Guido David at Fr. Nicanor Austriaco, nananatiling mataas ang bilang ng kaso ng Covid-19 sa National Capital Region, Bulacan, Cavite, Laguna, at Rizal kahit pa malaki na ang ibinaba nito kumpara nang magkaroon ng surge noong Abril.
“While we believe that we can relax restrictions, we think that we should try to retain the GCQ at this time because the cases are still significant,” giit ni David.
Ipinatutupad hanggang sa katapusan ng Mayo sa NCR Plus ang “GCQ with heightened restrictions.”
Sinabi ng grupo na masyado pang maaga para ilagay sa modified GCQ ang NCR Plus.
“Back in February, we were at 400 cases per day but we were still in GCQ so it doesn’t seem to be the time to relax to MGCQ at this time. It also gives us the wrong messaging to the people,” paliwanag ni David.
Nitong nakaraang linggo ay humigit-kumulang na 1,100 ang average na bilang ng arawang kaso ng Covid-19, o 80 porsyentong mas mababa kumpara sa kasagsagan ng surge noong Abril.
