IPINAGDIWANG ng Philippine Amusement and Gaming Corporation (PAGCOR) ang tagumpay ng golf star na si Miguel Tabuena sa kauna-unahang International Series Philippines na ginanap noong Oktubre 23-26 sa Sta. Elena Golf and Country Club sa Sta. Rosa, Laguna.
Bumida si Tabuena matapos magtala ng seven-under-par 65 sa final round para sa kabuuang 24-under 264. Tinalo niya ang mga Japanese golfer na sina Kazuki Higa (65) at Yosuke Asaji (67) na kapwa nagtapos sa 21-under.
“It was good to win an IS event, and I’m really glad that it was in the Philippines, my home country, in my home club, in front of my family, friends, and everyone who’s supporting me,” ani Tabuena matapos ang laban.
Nasungkit ng 30-anyos na golfer ang premyong $360,000 o humigit-kumulang Php21 milyon, na lalo pang nagpapatibay sa kanyang puwesto bilang isa sa mga elite player ng Asia.
Ang International Series Philippines, na bahagi ng Asian Tour at konektado sa LIV Golf League, ay itinuturing na malaking tagumpay para sa lumalakas na presensya ng Pilipinas sa pandaigdigang larangan ng golf.
Lubos naman ang paghanga ni PAGCOR Chairman at CEO Alejandro H. Tengco kay Tabuena sa pagbibigay-karangalan nito sa bansa at muling tiniyak ang patuloy na suporta ng ahensya sa mga atletang Pilipino at sa turismo ng bansa. Isa ang PAGCOR sa mga pangunahing sponsor ng torneo.
“This victory is a proud moment not just for Miguel, but for the entire country,” ani G. Tengco. “PAGCOR is committed to uplifting our Filipino athletes by supporting world-class events such as this. We believe that investing in sports is investing in our nation because it inspires our people, promotes tourism, and strengthens our reputation as a world-class destination for international competition.”
Dagdag pa ng PAGCOR chief, bahagi ng layunin ng ahensya ang itaguyod ang sports tourism bilang isa sa mga puwersang nagtutulak sa pag-unlad ng ekonomiya at mga komunidad.
“Hosting premier tournaments like the International Series not only highlights Filipino talent but also showcases the Philippines’ capacity to host global sporting events that draw visitors, boost local economies, and foster national pride,” aniya.
