MAY gustong iparating si AiAi delas Alas sa businessman at social media personality na si Xian Gaza na ibinunyag na may nabuntis na ibang babae ang mister ng komedyana na si Gerald Sibayan.
Sa kanyang Facebook page ay nag-post si AiAi ng message para kay Xian.
“Christian Albert Gaza PM mo naman ako. Di ako maka comment sa page mo eh. Hehehe,” aniya.
Nakiusap din siya sa isang kaibigan ni Xian na iparating ang kanyang mensahe.
“Thanks neng! Paki sabi nga pls. may tatanong ako. Hahahah,” chika niya.
Kaugnay nito, inihayag ni Xian na nag-follow back na siya kay AiAi habang kinaklaro na walang kinalaman ang huli sa post niya na nakabuntis umano ng ibang babae si Gerald.
“Hindi po totoo na si Madam Ai-Ai ang nag-utos sa akin para i-post si Gerald. That’s 100% fake news,” paliwanag niya.
“Kaka-follow niya lang sa akin two nights ago. I follow her back. Hindi pa kami nagkakausap until now,” dugtong niya.
“Baka eto na yung maging susi para magkaroon ako ng magandang kinabukasan sa Estados Unidos. Charot!” biro pa ni Xian.
Matatandaang isinapubliko ni AiAi sa mismong kaarawan niya noong Nov. 11 na hiwalay na sila ng asawa.
Ikinasal sina AiAi at Gerald noong December 2017.
