KUNG ang talent manager na si Ogie Diaz ang paniniwalaan, nangunguna sa takilya ang “And The Breadwinner Is” at kulelat ang “Isang Himala” sa ginaganap na Metro Manila Film Festival (MMFF).
Ani Ogie, sa Facebook, isiniwalat ng kanyang impormante na nag-number one sa takilya ang Vice Ganda starrer noong Pasko, ang unang araw ng festival.
“Wala pa daw sa kalahati ng gross nito ang #2 ‘nung opening day nito ‘nung Pasko,” lahad ni Ogie na ang tinutukoy ay ang “The Kingdom” nina Vic Sotto at Piolo Pascual.
Sinabi ni Ogie na sinusundan ang mga ito ng “Espantaho” ni Judy Ann, “Uninvited” ni Vilma Santos, “Green Bones” ni Dennis Trillo, “Topakk” ni Arjo Atayde, “My Future You” ng FranSeth, “Strange Frequencies” ni Jane de Leon, “Hold Me Close” ni Julia Baretto, at “Isang Himala” ni Aicelle Santos.
Klinaro naman ni Ogie na hindi kumpirmado ang impormasyon.
“Kung totoo man ito, congrats. Kung hindi, paki-correct na lang ang ranking kung mali ang source ko,” sabi niya.
Naniniwala naman ang talent manager na maaari pang magbago ang puwesto ng mga kalahok na pelikula.
“Magbabago pa ang trend niyan after the awards night. Normally, pag humahakot ng awards, naku-curious ang mga tao na panoorin,” dugtong niya.
Gaganapin ngayong gabi ang awards night.
