NAG-back out si Ion Perez sa planong pagtakbo bilang konsehal ng Concepcion, Tarlac.
Inanunsyo ni Ion ang desisyon sa pamamagitan ng isang TikTok video na ipinost niya noong Lunes, November 4.
“Sa mga kalugar ko diyan sa Concepcion, una po, maraming salamat sa tiwala at suporta n’yo na ibinigay sa akin. Pinapaalam ko lang po na hindi na po ako tatakbo o tutuloy bilang konsehal ng Concepcion,” wika ng “It’s Showtime” host.
Aniya, ihahanda muna niya ang sarili para makasiguro na maayos niyang mapagsisilbihan ang taumbayan.
“Gusto ko po munang ihanda ang sarili ko para hindi mapahiya at mapaglingkuran kayo nang tama. Muli po, maraming maraming salamat sa inyong tiwala. Paumanhin po,” dagdag ng mister ni Vice Ganda.
Ginawa ni Ion ang pahayag isang buwan makaraang maghain ng certificate of candidacy.
