NAKAPASOK sa top 10 ng North American box office ang Pinoy movie na “Hello, Love, Again,” base sa mga ulat na inilabas sa US nitong Linggo.
Nasa ikawalong puwesto ang sequel ng 2019 hit na “Hello, Love, Goodbye,” na pinagbibidahan nina Kathryn Bernardo at Alden Richards, makaraan itong kumita ng $2.32 million sa unang tatlong araw ng pagpapalabas.
Ito ang kauna-unahan Pinoy film na nagkaroon ng malawak na North American release. Mapapanood ito sa mahigit 240 sinehan sa US.
Nangunguna naman sa takilya ang “Red One,” ang action-comedy ni Dwayne Johnson na kumita ng $34 million.
Bumaba sa ikalawang puwesto ang “Venom: The Last Dance,” na tatlong linggong nanguna sa domestic box office chart, makaraang humamig ng P7.3 million.
Kabilang pa na nasa top 10 ang mga sumusunod: “The Best Christmas Pageant Ever” ($5.4 million), “Heretic” ($5.1 million), “The Wild Robot” ($4.3 million), “Smile 2” ($2.9 million), “Conclave” ($2.8 million), “A Real Pain” ($2.3 million) at “Anora” ($1.8 million).
