INAMIN ng suspek sa pagpatay sa Philippine Merchant Marine Academy (PMMA) cadet, na natagpuan sa banyo ng kanilang barracks sa San Narciso, Zambales, na sinuntok niya nang dalawang beses sa dibdib ang biktima.
Ayon kay Cadet Third Class Jomel Gloria, sinuntok niya si Cadet Fourth Class Jonas Bondoc bilang “pabaon” dahil pauwi ang huli sa kanilang bayan sa Mindanao para magbakasyon.
“Scheduled mag-break ‘yung victim, uuwi siya ng Mindanao. So sabi niya (Gloria), ‘Matagal na tayong hindi magkikita kabayan so I’m happy for you. Makakauwi ka na sa atin. Good luck!’ Parang ganoon. Parang, ‘Pabaon ko lang ito, lambing lang’,” ani Zambales Police provincial director Col. Romano Cardiño.
“Kaldag nga ang tawag nila. Unang beses tapos tawanan sila. Tapos isang beses pa ulit, ‘O, isa pa, isa!’ ‘Yon, ‘pag ‘kaldag’ daw niya ng pangalawang beses, doon na daw nag-collapse,” dagdag ng opisyal.
Napag-alaman na walang away sina Gloria at Bondoc. “Magkaibigan ang dalawa,” ayon sa kanilang mga kasamahan.
Nahaharap sa kasong homicide ang suspek, na tinanggal na sa PMMA.
Samantala, bago ang pagpatay ay sinuntok din umano ni Gloria si Cadet Third Class Kent Soloveres.
