SI Vice President Leni Robredo ba ang pinatutungkulan ni Department of Interior and Local Government Undersecretary Epimaco Densing nang sabihan nito na “si lugaw ay non-essential”?
Ito ang tanong ng karamihan matapos magbigay ng komento si Densing sa nangyaring paninita ng mga opisyal ng barangay sa Bulacan sa isang Grab driver na magdedeliber ng lugaw.
Sa panayam ng programang Sa Totoo Lang, klinaro ni Densing ang kaibahan ng “si Lugaw” at “ang lugaw”.
“Tama ho ‘yun. Tama. Tama ‘yung sinabi niya (tanod). Sabi niya kasi, non-essential si Lugaw, o talagang ano, hindi talaga essential si Lugaw. Pero kung sinabi niya, essential ang lugaw, ‘yon tama ‘yun. ‘ang lugaw,’ Pero ‘si Lugaw’ ang binanggit niya e. Non-essential talaga ‘yon sa pananaw namin,” ani Densing.
Agad naman niyang itinaas ang kanyang mga daliri para gumawa ng “peace sign” at sinabi na “Peace” habang nakatawa.
Matatandaan na “lugaw” ang madalas itawag kay Robredo ng mga basher at supporter ni Pangulong Duterte.
