VIRAL ngayon ang video ni Pasig City mayoral bet Christian Sia dahil sa tila umano’y sexist na biro nito habang nangangampanya.
Lalo pang napalala ang pagka-trending ng video nang tawanan lamang ng aktres na si Ara Mina, na tumatakbo ring konsehal sa syudad, sa biro ni Sia tungkol sa mga solo parents na nireregla pa.
Sa kanyang biro, sinabi ni Sia na : “Minsan sa isang taon, ang mga solo parent na babae, na nireregla pa, malinaw…nireregla pa, at nalulungkot, minsan sa isang taon, puwede pong sumiping sa akin.”
Maririnig naman sa 23-segundong video clip na in-upload ng isang @Ricci, ang mga tawanan ng mga nakikinig sa kanya, kabilang si Ara Mina.
Halos na sa 700,000 views na ang trending video na kumalat sa X (dating Twitter), habang trending naman ang pangalan ng aktres sa nasabing social media platform.
