DINISMIS ng Quezon City Prosecutors Office ang mga kasong direct assault at grave coercion na isinampa laban kay Vice President Sara Duterte ng pulisya.
Sinampahan si Duterte, kasama ang kanyang security aide na si Col. Raymund Dante Petina Lachina ng reklamong paglabag sa Articles 148 (Direct Assault), 151 (Disobedience to Authority), at 286 (Grave Coercion) ng Revised Penal Code ni Police Lieutenant Col. (Dr.) Van Jason Conag Villamor.
Sa kanyang reklamo, sinabi ni Villamor na diumano’y siya’y sinaktan sa kalagitnaan ng commotion habang inililipat ang abogadong si Zuleika Lopez mula sa Veterans Memorial Medial Center (VMMC) sa St. Lukes Medical Center sa Quezon City noong nakaraang Nobyembre.
Ayon sa Quezon City Prosecutor ang reklamo ay hindi suportado ng ebidensya.
“Interestingly, not one of the witnesses of PLtCol. Villamor corroborated his claims regarding the purported attack, employment of physical force, intimidation, resistance, disobedience, violence and threats,” ayon sa resolusyon.
“They did not narrate the encounter between the parties in their respective affidavits. They also did not discuss the behavior of PLtCol Villamor after the incident, which could have persuaded us that he was threatened and intimidated, if at all,” dagdag pa ng resolusyon.
“Being so, we are constrained to dismiss the complaint for insufficiency of evidence,” ayon pa sa resolusyon.
Matatandaan na si Lopez, chief of staff ni Duterte, na dumanas ng panic attack matapos siyang i-cite in contempt ng House Committee on Good Government and Public Accountability kaugnay sa isinasagawa nitong pagdinig hinggil sa paggamit ng pondo ng Office of the Vice President.
