PATAY ang sundalo at dalawang miyembro ng Citizen Armed Forces Geographical Unit (Cafgu) habang anim ang sugatan nang mahulog sa bangin ang sinasakyan nilang truck sa Sitio Boston, Brgy. Andap sa New Bataan, Davao de Oro noong Sabado ng umaga.
Ayon sa ulat, binabaybay ng KM450 troop transport ang kalsada sa Sitio Langag nang biglang umurong ang sasakyan sa paahon na bahagi ng daan.
Nawalan ng kontrol ang driver kaya dumire-diretso ang truck sa bangin.
Nasawi sa insidente sina PFC Jaynor Makakua, CAA Reynald Balaga, at CAA Ferlan Conception.
Sugatan naman ang iba pang mga sakay na sina 1LT Fidel Castro, Sgt. Michael Arzaga, Cpl. Emil Joy Mission, Pvt. Jonel Alvarado, CAA Jay Ar Bale, at CAA Kim Ardel Castro.
Napag-alaman na patungo sa Brgy. Andap mula sa Brgy. Cabinuangan para sa isang event ang mga sundalo nang maganap ang aksidente.
