LIMA ang nasawi nang banggain ng delivery van ang tuktuk tricycle sa Maharlika Highway sa Canda Ilaya, Lopez, Quezon nitong Miyerkoles ng madaling araw.
Apat sa siyam na sakay ng nasabing tuktuk tricycle ang dead on the spot samantalang nasawi naman ang isa sa pagamutan.
Naganap ang aksidente alas-2:30 ng umaga.
Base sa inisyal na imbestigasyon ng Lopez Police, patungong Bicol para makipiyesta ang tricycle nang masalpok ito ng kasunod na delivery van.
Sa lakas ng impact, nabangga ng tricycle ang likurang bahagi ng isang bus.
Nagliyab ang nasabing tricycle hanggang sa madamay at magliyab na rin ang pampasaherong bus.
Sunog ang apat na sakay ng tricycle, lima ang naisugod sa pagamutan na lahat at nagtamo ng matinding sugat sa katawan.
Ayon sa mga otoridad, ilan sa mga sakay ng tricycle ay mga bata.
Wala namang naiulat na nasugatan sa mga pasahero ng bus.
